A Frauenbundfrau, des woaß ma genau,
macht oiwei ihr Schau ois Frauenbund–Frau.

Sie is leicht zum kenna, hat oiwei wos z´renna,
denn´s Progamm is meist groß, drum is oiwei wos los.

Amoi bastl´n, amoi singa, sie fahrt nach Berlin oder Minga,
a g´scheits Frauenbund–Wei is da überoi dabei.

A Frauenbundfrau macht aa sonst no ihr Schau.
A neus Gwand, neue Schuah, dazua de passat Frisur
muaß a Frauenbundfrau hom,
wos daadn de ander´n sonst sag´n?

Oft muaß kocha und bacha, beim Basar derfs mitmacha,
Theater muaß spuin und beim Witze erzähl´n
is aa meist recht schlau, so a Frauenbundfrau.

A so a Frauenbundfrau, des woaß ma genau,
hot a ganz anders G´fries, wenn da Weiberfasching is.

Da is nimmer zum Kenna vor lauter lacha und renna,
denn so a Frauenbund–Wei is im Fasching ganz „high“.

Und bist a Frauenbundfrau–Mo, dann bist guad dro,
derfst dahom bleib´n beim Haus, denn sie geht ohne di aus.
Du kannst dich entfalten, konnst dahoam schalten und walten,
wos ganz g´wiß net waar, wenn’s net beim Frauenbund waar.

Drum Manderl sei schlau, host koa Frauenbundfrau,
lass zum Frauenbund geh, dann host as aa dahoam schee!